Thangsira leh Thangzaia hi unau an ni a, tlangval hmeltha tak an ni ve ve a. Tin, nula unau pahnih Lasiri leh Lasari, van chung lamah an awm bawk a. Thangsira leh Thangzaia te unau chuan Lasiri leh Lasari te unau chu an han rim thin a, an kal dawn apiang hian hetiang hian an han au hmasa thin a,
Lasiri, Lasari I hrualhrui te rawn thlak la,Tichuan anni chuan an hrualhrui chu an zuk thlak a, Thangsira leh Thangzaia chu an uai chho thin a.
Kei lo uai chho ve nang e,
Thangsira leh Thangzaia te unau tihdan chu Bakvampu hian a lo hre ve a, aw thum pui hian, “Lasiri, Lasari I hrualhrui te rawn thlak la, kei lo uai chho ve nang e” a han ti hlut hlut a. Lasiri leh Lasari chuan Thangsira leh Thangzaia aw a ni lo tih an hria a, an hrualhrui chu an thlak duh lova. Tichuan Bakvawmpu chu a mangang a, hmeithai pitar te hi a rawn a. Pitar te chuan, “Thangsira leh Thangzaia ek hmawr ei la, an zun tlem te in bawk la, tichuan an aw ang I pu ang a, an hre lovang che” a lo ti a. Tichuan Bakvawmpu chuan Thangsira leh Thangzaia zun leh ek them chu a ei ta a. Chumi hnuah chuan “Lasiri, Lasari, I hrualhrui te rawn thlak la, kei ka lo uai chho ve nang e,” a va ti leh a. Lasiri leh Lasari chuan an lo hai ta a. Thangsira leh Thangzaia aw emaw an ti a, an hruaihrui chu an zuk thlak a, Bakvawmpu chu a lo uai a, an han hnuh chhoh chuan rit an ti ta hle mai a. “Thangsira leh Thangzaia an ni awm lo mang e, an va rit ta em!” ti chung zel chuan an han hnuk chhuak a. Bakvampu chu a lo ni ta ruau mai a. Lasiri leh Lasari chu an mangang ta hle mai a, a tihthlak leh dan tur an ngaihtuah leh ta nghal a. Tichuan zanah chuan an han mu a, Bakvampu chu a vausaah an muttir a, Lasiri chuan “Ka pu, tawlh rawh, Lasari mutna bo” a han ti a Bakvampu chu a tawlh hrut a. Nakin deuhvah chuan Lasiri chuan “Ka pu tawlh rawh, Lasari mutna bo” a han ti leh a Bakvampu chu a tawlh leh hrut a. Tichuan a tawlh liam a, a tla leh ta daih mai a.
Nakinah chuan Thangsira leh Thangzaia te unau chu an lo kal a, “Lasiri, Lasari I hrualhrui te rawn thlak la, kei lo uai chho ve nang e” an han ti leh a. Mahsela anni chuan “Min tihder a ni thin e, Bakvampu a ni leh ang” an ti a an thlak duh ta lo va. Thangsira leh Thangzaia chuan “Rawn thlak rawh u, Bakvampu kan ni lo ve, keimahni kan ni e” an tih pawhin “A, Bakvampu a ni leh dah ang e” an ti a, an hrualhrui chu an thlak thla duh ta tlat lo va. Tichuan Thangsira leh Thangzaia chuan “A nih leh, mei kan han khuh ang a, Bakvampu mei khu chuan lui dung a zawh nguai nguai ang a, keini mei khu erawh chu van lamah a lo ding ngat ngat mai ang” an ti a. Mei chu an han khuk ta a, an sawi ang ngei chuan an mei khu chuan van lam chu a kawk a, a ding ngat ngat a, Bakvampu mei chuan lui dung chu a zawh nguai nguai a. Anni unau chu in lamah an haw ta daih mai a.
Tin, Lasiri leh Lasari chuan Thangsira leh Thangzaia mei an zuk hmuh chuan an sawi ang ngei chu a lo ni ta si a, an inchhir a, an lung chu a leng ta em em mai a. Anmahni um tur chuan an chhuk thla ve ta thung a. Tichuan an kalna kawngah chuan an um zel a, Lawmrual hi an va hmu a,
Khata lawmrual pali panga te u,an han ti a. Anniho chuan
Thangsira hmu che maw
Thangzaia hmu che maw
A hmu chu kan hmu na a,an lo ti a. Mual sarih chu inzawn thliai hian an han kawn ta a, an kal liam tur ar chang tawn phe ngeuh ngeuh chu an han hmu ta a. An um ta zel a.
Mual aw khum khum,
Thangsir aw lang lang,
Thangzai aw lang lang,
A tawn ar chang phe ngeuh ngeuh,
Bakvawmpu chuan a chhakah chuan anni chu a lo um ve zel bawk a. Thangsira leh Thangzaia chu in an thlen chuan pumah thir chher turin an kal a, Lasiri leh Lasari pawh chu an lo thleng ve thuai a.
Lasiri leh Lasari chu an hmeltha em em mai a, an inthuamna te chu kawr tha tak tak an ha a, pakhatin Rangkha a feng a, pakhatin Rangkachak thi a awrh a, ngunte an bun bawk a. “Thangsira leh Thangzaia kan rawn zawng a nia” an ti a, Thangsira leh Thangzaia nu chu pitar mitdel a ni a. Mitdel chung chuan thing phurtu leh tui chawitu ber a ni a.
Lasiri leh Lasari chuan a mit chu an rawn tihmen sak a, thing tlemte a neih chu ai khatah an siam sak a. Thangsira leh Thangzaia puma an awm chu naupang an han kohtir a, “Thangsira leh Thangzaia kha lo haw rawh se, mikhual kan thleng e” a han tihtir a. Anni chuan, “Khual chhia nge khual tha, mi eng ang nge an nih?” an lo ti a. Naupang chuan, “Khual chhia an ni ang, pakhatin Ngansap a feng a, pakhatin Belval a awrh a, khang te an bun a” a ti a. Chutiang mite chu taife leh bapilte kha lo eitir sela, hnawtchhuak leh mai rawh se an lo ti a. Tichuan Lasiri leh Lasari chu taife leh bapilte an eitir a, an lo hnawtchhuak leh ta a. Lasiri leh Lasari thin chu a ur em em a, an kal leh ta a. An kal dawn chuan Thangsira leh Thangzaia nu mitdel an tihvar sak pawh kha an tidel leh a, thingkhawn pawh chu a pangngai angin fak thum lekah an chantir leh a.
Nakin deuhvah chuan Thangsira leh Thangzaia thir chher zo chu inah chuan an zuk haw a, an chhungte hnenah chuan “Tute nge kan mikhualte chu?” tiin an han zawt a. Anni chuan “Lasiri leh Lasari an ni a, in thu ang khan taife leh bapilte kan pe a kan hnawtchhuak leh ta mai” an lo ti a. Thangsira leh Thangzaia chuan pawi an ti ta em em mai a, an ngai a, an um ve leh ta thung a.
An kalna kawng ni lo lamah an lo tlan khalh a, Lasiri leh Lasari kalna turah chuan an hmuh ngei turah hian Dartawnsukah an lo chang a, an lo inphun su ngeuh ngeuh va. Lasiri nau zawk chuan
Ai ka u-e ka u-e,a ti a. A u chuan
A he Dartawnsuk te hi
La ta mai mai tang ka ti,
Ai ka nauvi, ka nauvi,a ti a, la lovin an kalsan ta a.
Thangsira leh Thangzaia an ni ang e,
Thangsira leh Thangzaia chuan an lo tlan khalh leh a, Darkawngchilh-ah an lo chang leh a. Lasiri leh Lasari kalna turah chuan an lo inbang leh a, a nau chuan
Ai ka u-e ka u-e,a han ti leh a, a u chuan
A he Darkawngchilh te hi
La ta mai mai tang ka ti,
Ai ka nauvi, ka nauvi,a ti leh a, an kalsan leh ta a.
Thangsira leh Thangzaia an ni ang e,
Tichuan anni chuan an tlan khalh leh a Darbenvawn-ah an chang leh a. Lasiri leh Lasari kalna tur thing bulah hian an lo inbang leh a, a nau bawk chuan
Ai ka u-e ka u-e,a han ti leh a, a u chuan
A he Darbenvawn te hi
La ta mai mai tang ka ti,
Ai ka nauvi, ka nauvi,a ti leh a, la lo bawkin an kal leh ta a.
Thangsira leh Thangzaia an ni ang e,
Chutia an kal zel lai chuan ruahpui van-awn a lo sur a, Lasiri leh Lasari chu ruah chuan a nan huh hrep a, vawt ti chuan an khur an khur ta mai a. Tin, Thangsira leh Thangzaia kha chu kham puk hul phiangah hian meiah an lo chang a, an lo vam hiam mai a, a nau chuan
Ai ka u-e ka u-e,a han ti leh a, a u chuan
A he meipui a tha hi
Ai ta mai mai tang ka ti,
Ai ka nauvi, ka nauvi,a ti leh a. Khur khur chung chuan an kal pel leh ta a. Tin, an kalna turah chuan lui pakhat hi a lo awm a, tui chu a lo lian viau mai a. Phulraw leilawn rawp tawh chim lek lek hi a lo indawh a, chu mi thlangah chuan Thangsira leh Thangzaia chu dar leilawnah an chang a, an lo indawh kai zar mai a.
Thangsira leh Thangzaia an ni ang e,
Tichuan kalna dang a awm si lo va, chu dar leilawn chu zawh an tum ta a. A nau chuan a va zawh zai zai a, a zawh kai mai a, a u chuan a han zawh ve a, a lai a thlen chuan a au ta tuar tuar a, a chim dawn a, a kir leh ta a. A nau chuan a duh duhin a zawh kai a, mahse a u a kal chuan a lai a thlen hian a tliak dawn leh thin a. Tihngaihna an hre lo va, a nau chuan a u chu a paw ta a. An han zawh leh a, a lai an thlen chuan a tliak a, an tla ta a.
A nau chu engemaw tiin a vak chhuak thei hram a, a u chu a chhuak ve thei lo va, tui chuan a len a, a nau chuan vaukam atang chuan a um zel a, “Ka u, hleuh rawh, ka u , hleuh rawh” a ti zel a, a hleuh thei chuang si lo va. Chutih lai tak chuan Thim a lo zing ta a, a nau chu Uleuh-ah a chang ta a “Ka u, hleuh rawh, ka u, hleuh rawh” a tih chu hram nan a hmang ta a. “Uleuh, Uleuh” a ti hlen ta a ni an ti.
A tawp ta
Thulakna: Mizo Thawnthu, Dahrawka
I Ngaihdan Leh I Comment Hnutchhiah Te Kan Ngai Pawimawh A Ni. EmoticonEmoticon