Tunlai kan hun tawng hi ka dawn changin hrilhhai thlak ka ti thin. Kan nun dan inthlak danglam chak lutuk hian ka nunah harsatna min thlen nasa hle mai. Keimah hi chu chawhnu lamah ka lo in dah chhin ngai lo reng reng a. Mahse, khawvel chuan chawhnu list-ah min lo ziak lut lek lek tawh reng mai hi a lo ni. Ka hriat chinah zet chuan tunlai thangtharte hming ziaknabuah a tlar hnuhnung ber zinga mi ka lo ni reng mai. Khawvel chungah lungawi loh ka tum a. Mahse, thil nih phung thlak dang lam theih loh, hun inher danglam chho zelin a chhawm nun zel a lo ni. Ka vanglai ni, ka hun a zawnga hlu ber chu tuilian ang maiin a liam tan ta si. Thangtharte karah hun leh hmun chang lovin, Riakmaw ianga riahrun vaiin ka hun hnuhnung chu ka hmang tan ta. A lungchhiat thlakin, a khawhar thlak hle mai! Mangtha ti a, han thlah liam mai chu ka zuam lo a ni.
Kan pi leh pu ten ‘heh’ khur der der chunga an vanglai hun an han sawi ka ngaihthlak changin ka thinlung chhungril lamah hlauhthawnnain ka khat thin. Mahse, nitin, darkar tin liam reng mai chuan an mahni ang ni turin min hnuk reng mai si a, lo tang zo turin chakna reng ka nei lo. Ka hlauin, ka lungngai tak zet a ni. Ka vanglai hun hi ka chelh zo lo rau rau chu "eng tiangin nge ka hman tak ang?"tiin ngaihtuah min neihtir thin.
Kan vanglai hun leh keimahni ngei pawh hi liam mah ila, kan thu erawh a awm reng dawn a ni. Chuvangin kan thu (kan nungchang) hi kan uluk a ngai. Kan hnua thangthar lo ding leh tur te tan entawn tur kan hnutchhiah a ngai a ni. Kan vanglai hian ziak loh chanchin bu kan buatsaih a pawimawh hle mai. Rannungte anga chanchin chhui tur awm tawh lo ang ni lovin, kan vanglai hun tawiteah hian chanchin bu tha tak kan buatsaih a pawimawh. ‘Ka nun hi mawi takin ka chher anga mi ten an thinlungah min hre reng rawhse’, tih hi kan beisei ngam tur a ni. Thangthar te u......kan vanglai hun hi a rei dawn lo, chuvangin kan hun hlu hi ruihhlo bawiah tantir lovin kan khawtlang, kohhran leh chhungkua cheimawi nan i hmang zawk ang u. Thalaite thiltha ti a tana buatsaih kan ni. Harhchhuakin khaw dang thalaite i el ve tawh ang u.
Kan vanglai hun leh keimahni ngei pawh hi liam mah ila, kan thu erawh a awm reng dawn a ni. Chuvangin kan thu (kan nungchang) hi kan uluk a ngai. Kan hnua thangthar lo ding leh tur te tan entawn tur kan hnutchhiah a ngai a ni. Kan vanglai hian ziak loh chanchin bu kan buatsaih a pawimawh hle mai. Rannungte anga chanchin chhui tur awm tawh lo ang ni lovin, kan vanglai hun tawiteah hian chanchin bu tha tak kan buatsaih a pawimawh. ‘Ka nun hi mawi takin ka chher anga mi ten an thinlungah min hre reng rawhse’, tih hi kan beisei ngam tur a ni. Thangthar te u......kan vanglai hun hi a rei dawn lo, chuvangin kan hun hlu hi ruihhlo bawiah tantir lovin kan khawtlang, kohhran leh chhungkua cheimawi nan i hmang zawk ang u. Thalaite thiltha ti a tana buatsaih kan ni. Harhchhuakin khaw dang thalaite i el ve tawh ang u.
Khawvel a changkang chho zel ang hian keimahni pawh hian chu chu ban pha tura theih tawp kan chhuah a ngai a ni. Kan khawtlang te, kan chhungkua te, kan kohhran te hi thangtharte hian tunlai hunah kan hlangchho thiam tur a ni. Keimahni chauh kan in tih changkan hian miten vawih reng si rimtuiah a inngai min ti palh thei. Chuvangin tunlai taka kan nun rualin kan chhehvel pawh kan cheimawi thiam tur a ni. Chhumhlim ang maia rei lo he kan vanglaini hi zing ni chhuak chuan a her liampui zel si a. Nakin lawkah chuan kan la tar ve ang a, thihna kutvawt chuan min la man ve ngei ang. Chu hun a thlen hma chuan thalai te hian vanglaini chhinchhiah tlak kan Kohhran tan, kan Khawtlang tan leh kan Chhungkua tan buatsaih i tum ang u. Han hawivel ila siamthat tur leh tundin tur a tam si a. Chuvangin kan vanglaini hi thu lawilo sawi nan te, nuihza fiamthu sawia thut mai mai nan te hmang tawh lovin, kan nun a zirtur leh thil tha chhinchhiah tlak thangthar lo awm leh tur te tan rohlu in hlanchhawn tur kan hnutchhiah hi a pawimawh tak zet a ni.
Kan mizo thuanthu a lar em em ‘Taitesena’ kha tun hunah pawh kan la mamawh reng a. A mah pakhat vanga a khawtlang a mawi theih chuan tun hunah keini thalai te hi Taitesena ang han ni thei vek i la zawng kan khawtlang hi a va mawi dawn em! Pathian ramah kan cheng a ni dawn a. Chu bakah, kan parmawina chu kan chheh vel a mi dang te tan khuaizu ang a thlum a lo ni ang a. Chu hunah chuan kan khawvel hi siamtharin a awm leh anga, chutichuan kan vanglaini chu chhinchhiah tlak chhawimawina a khat a lo ni tawh dawn a ni. Kristian thalaite kan nih angin hawh u, hmathlir thui tak nei chungin kan vanglai hun hlu hi lungrualna nen i chen za ang u.
Ziaktu: Pu Ramdinzaua (Tuingo)
I Ngaihdan Leh I Comment Hnutchhiah Te Kan Ngai Pawimawh A Ni. EmoticonEmoticon