Sakhi Leh Satel Intlansiak Leh Chungleng Leh Hnuaileng Indo
Sakhi pakhat hian Rulpui tui inzuan kahlensiakah Satel a sawm a, Satel chuan,
"Ka zuan kahlen zo lo vang a. Rulpui tui ka bawhkeh ang maw le,"
a ti a. Sakhi chuan,
"Bawh keh mah la ka chhan ang che,"
a ti talh a, tichuan an inzuan kahlensiak ta a.
Sakhi chu a han zuang a, a zuan kahlen thauh mai a, Satel chuan a han zuan ve a, a zuan kahlen zo ta lo va, Rulpui tui chu a bawh keh ta rum mai a. Sakhi chuan a hlau ta em em mai a,
"Tela tlan mai raw, ka hum ngam bik lo a che,"
a ti a, a tlansan ta daih mai a.
Satel erawh chu a tlan pawh tlan hlei thei lovin, chhuk zawngin a lum hian a lum bawp bawp mai a. Savawm In hi a zuk deng dawt mai a. Savawm chuan,
"Tunge ka in deng?"
a ti a.
"Keimah Teltea,"
a ti a,
"Engnge i hlauha i tlan chhiat?"
a ti a,
"Sakhipa nen Ruipui tui kan inzuan kahlen siak a, ka bawh keh a, ka hlau va, ka tlan ani,"
a ti a. Savawm chuan,
"E khai, ka hum ngam awzawng lo mai che, tlan leh mai tawh,"
a ti a, a tlan leh ta a.
Sakei In hi a zuk deng leh dawt a,
"Tunge ka in deng?"
a lo ti a, Satel chuan thil awm dan zawng zawng chu a han hrilh leh a. Mahse Sakei pawh chuan a hum ngam bik loh avangin a tlan chhe leh ta zel a.
Tichuan Satel chu a tlan leh ta a. Mura In hi a zuk deng dawt mai a,
"Tunge ka in deng?"
a ti a.
"Sakhipa nen Rulpui tui kan inzuan kahlen siak a, ka bawh keh ta a, ka hlau va, ka tlan ani,"
a ti a. Mura chuan,
"Hawh, hlau suh, ka hum ang che," a ti ta a.
Nakinah chuan Rulpui chu a lo tleng ri hruah hruah a, Mura chuan,
"Chu eng thawm nge ni ta?"
a ti a, Satel chuan,
"Chu chu alawm ka hlauh, Rulpui tleng ri a nih chu,"
a ti a, Mura chuan,
"Ka thla hnuaiah hian biru rawh le,"
a ti a, a biru ta khiau mai a.
Rulpui chu a lo thleng ta ngei a, Mura hnenah chuan,
"Teltea i lo hmu em?"
a ti a. Mura chuan,
"Hmu teh suh ei a!"
tiin a chhang a.
"I in chinah chiah a hniak a tawp si a, i thukru a ni ang, i thla kha han zar teh,"
a ti a. Mura chuan a thla leh lam chu a han zar duai duai a,
"Lehlam kha han zar leh teh,"
a ti a. Mura chuan,
"He lam hi zawng a na a ni,"
a ti ta tlat a.
"Tlemte talin han kau teh,"
a ti talh a, a han kau a, Satel mei chu a hmu ta hlauh mai a, chumi a chinah chuan an indo ta a. Chu chu, "Chungleng leh Hnuaileng Indona bul" chu zuk lo ni a.
Mura in Satel a hum avang chuan Chungleng leh Hnuaileng an inhaw hlen a, an indo dawn ta a. Hnuaileng zawng zawng chu hmun khatah an inko khawm a, Chungleng zawng zawng pawh an inko khawm a, Bungpui zarah an fu khawm tuih mai a. An inbeih dan tur chu an ngaihtuah ve ve mup mup mai a, tichuan an inbei ta a.
Rulpui chu a ding ur ur a, Bung zar leh lam chu a takin a han vaw bal hlawk mai a. Chumi zara sava zawng zawng chu hlau deuh mai hian an darh ta ur ur mai a. Hnuailengho chu an hilm hle mai a, an haw haw dur dur a, an hotu Rulpui thiltih chu an lawm em em mai a.
Rulpui chu a hah a lo dam a, a ding leh ur ur a, Bung zar leh lam chu a han vaw tliak leh ta mai a, Hnuailengho chu an hlim leh zual a, Chunglengho eraw chu an ngui deuh rawih hlawm a.
An zingah chuan Bak a tel ve a, a thlawh ve theih avangin Chungleng zingah a inchhiar a. Mahsela chutia Hnuailengho chu an che tha zawka a lan avangin Bak chu Hnuailengho hnen lamah a thlawk thla a. An hnenah chuan,
"Hei mi en ula, ka lu te, ka ha te hi, Hnuaileng ka nih hi,"
a ti a, tichuan Hnuaileng awmin a awm ve ta a.
An indo chu an in bei nasa deuh deuh va, Chengkawlte hian Chipte ngal delh tliah ngawt an tum a; Vatele hian Changpatte man talh an tum bawk a. Tichuan a lian leh a lian, a te leh a te, mahni tum tawk tawk chu theihtawp chhuahin an inbei nuai nuai mai a ni.
Nakinah chuan Rulpui chu Mura chuan a ching ta nawk nawk mai a, Rulpui chu a chau ta hle mai a. Chuvang chuan Chunglengho chu an hlim ve leh ta thung a, an hotu Mura huaina leh thiltih chu an lawm a, an haw haw ve dur dur thung a.
Bak chuan chu chu a hmuhin Chungleng lama tan a chak leh ta hle a. An hnenah chuan a thlawk chho leh ta a,
"Min han en mah teh u, Hnuaileng ka nih loh hi, thla pawh ka nei a nia,"
a ti a.
Tichuan an indo chu an inbei nasa dueh deuh a, Rulpui chu a lo ding leh ur ur a, Bungpui zar chu a vaw leh vak a, a tliak zo ta lova, a kakpuiah chuan a inbang ta hnup mai a. Chu veleh Mura khan a zangruh tak mai chu a hmuiin a chilh tliak ta vek a, a thi ta a. chunglengho chuan an ngam ta zawk ani.
An indo lai khan a dawizep avanga Bak kha thlawk tawn fo a nih avang khan, Chungleng leh Hnuaileng inrem hnuah pawh pawl tur a hre ta lo va. Chhunah pukah a tawm bo tlat a, zanah chauh an hmuh lohah a leng chhuak ve ngam ta ani an tia lawm.
A Tawp Ta!
Get notifications from this blog
I Ngaihdan Leh I Comment Hnutchhiah Te Kan Ngai Pawimawh A Ni.