Hmanlai hian nula leh tlangval inhmangaih em em an awm a, an hming chu Tlingi leh Ngama a ni a. Nula tlangval inngaizawngte tih thin dan pangngaiin hmun biru tak, anmahni chauhvin an hriatah an inhmu thin a. Ni khat chu chulai tlang bawk bulah chuan an inhmu ang tiin an intiama .
Chunglai hun chuan khua leh khua an indo nasa hle thin a, biru chunga inveh thin an nih avangin tumahin an awm a ni, tih hriattir nan thawm riva an nei duh ngai lo.
An inhmuhna tura an lo tiam tawh hmunah chuan Tlingi chu a thleng hmasa a, ngawi rengin a thu a, chulai hmuna lokalte chuan tuman an hmu thei lo. Ngama pawh chu chu tlang tohlawt sir lehlamah chuan ngawi rengina lo thu ve bawk a, a ngaihzawng nu lo thlen hun chu nghakhlel takin a lo thlir a, inhnaih hle mahse an tawngchhuah ngam loh avangin an awmhmunah chuan an lo innghak dun ngawt ngawt a. An innghahna hmunah chuan thing tang tlem azawng an dah ve ve a. Tin, mau danglam tak anmahni pahnih chauhvin an hriat chu intiam nan an hmang bawk thin.
An innghahna hmunah chuan reilote chauh emaw innghak an intih laiin ni tam tak a lo vei hman der a. Tlingi lungleng lutuk chu a thi ta nghe nghe a, chutia a thih hnuah chuan Ngama chuan Tlingi thlan hmunah chuan Bung a phun a, chulai hmun chu a khat tawkin a tlawh reng thin.
Ni khat chu a thing phun ata lo parchhuakte chu a uai deuh hnup hian a hria a, mak a ti hle mai a, thil awmzia hriat tumin a bul hnaiah chuan a biru ta a.
Zing khawvar hmain Sanghar a lokal a, a par tha tha chu a rawn lo zat zat a, Ngama chuan a lo man thut mai a, a lawh chhan a zawt ta a. Chu Sanghar chuan Tlingin lo turin min tir alawm, tiin a chhang a. Thlarau mi anih tawh avang erawh chuan mihring pangngai nen chuan an inang thei tawh si lova, mahse Ngama chuan thlarau khawvelah pawh nise Tlingi chu hmuh a tum tlat a. Zinkawng harsa leh manganthlak tak a kal pelh hnuah chuan Tlingi te awmna khua, mitthi khua chu a zuk thleng a, Tlingi nen chuan an inhmu ta a.
Ngama chuan Tlingi te in chu sak that thuai ngaiin a hria a, insakna hmanrua la-in ram lamah a va chhuak a. Tlingi te ngaihdana thing tha leh thing lian chu Ngama tan chuan engmah a ni si lo. Thil te reuh te te leh chhe mai thei chi vek hnim hnah leh thingro te an duhtawk mai zel a. Ngama tan chuan a mak hle a ni.
Ram an han chhuak ho leh a, a changin sanghate an han man a,Tlingi ngaiha savawm lian tak te chu Ngama tan chuan pangang ang mai a ni a, Tlingi ten sangha lian tak nia an hriat chu Ngama tan chuan hnahthel ro mai mai a ni si a. An awmna khawvel a inan loh avangin an thil hmuh leh hriat dan chu a inang lo em em a ni, tih Ngama chuan a hria a.
An duhzawng leh awmdante a inan theihna turin Ngama chu an khaw lamah a han hawng chho leh ta a. Chutah chuan amah leh amah a han intihlum a, thlarau mi-ah lo changin mitthi khuaah chuan a kal ve leh ta a. Chumi hnuah chuan Tlingi nen chuan an thil hmuh leh hriat dan te pawh a lo inang tlang ta hle a ni.
Tichuan Tlingi leh Ngama te chuan mitthi khuaah hlim takin hun an hmang thei ta a. Mihringte chenna khawvelah an duh angin hlim thei lo mahse, mitthi khaw lamah erawh chuan dipdaltu awm lovin an inhmangaihzia thu sawiin hmangaihna par an tlan dun ta a ni.
A Tawp Ta ...
I Ngaihdan Leh I Comment Hnutchhiah Te Kan Ngai Pawimawh A Ni. EmoticonEmoticon