Lalruanga Tui Thuhruk|Laiphir

Lalruanga tui thuhruk hi Mawmrang tlang tlak lam kham pang, Phullen ram lamah hnar neiin kawrpui thuktak a ni a, he kawrah hian lengkir sâng tak tak a tam hle. Ṭhâl lai chuan he kawrtui hi a kangchat ṭhin a Amaherawh chu, he kawra lungpui liantak hnuai pûkah hian engtik lai maha kang ve ngai lo tuikhur te reuh te, tui tui leh fimtha êm êm mai engtik laia hiah nge tih pawh hriat loh biru em em si a awm a, he tui hi pi leh pute hunlai atang a Lalruanga tui thuhruk an lo tih ṭhin a ni.

Sailo Lal Awksarala (Phullen Lal) leh a hote, Pawlrâng ramah ramvakin an kal a, hetih hunlai hi thalvaekchar lai tak mai a nih avangin leh khua a ro êm avângin Lalpa Awksarala chu a tui a hâl ta hle mai a. A hote chuan Lalruanga tui thuhruk chu an zuk chawi dawn a, mau leh rua tui chawina tur a wm mai loh avangin Lal silai (Laiphir) chuan tui an chawi ta a, chuvâng chuan Laiphir tui tiin an sawi ta a, a lui pawh Laiphir lui tih a ni ta zel a ni.

He Tui "Lalruanga Tuithuhrûk" hi Phullen ram chhung, Mawmrâng Tlâng bulṭhut a awm a ni a. Phullen atangin awlsam taka kal mai theih a ni a. A bul vel hi Mawmrang Tlâng / Khâm chhengchhe pui pui leh, ram ngaw nuam tak te a ni hlawma, fan tham tak a ni a. A awmna atanga hla vak lovah hian Thado Lal Siakzapauva in kulhna ṭhin "SIAKZAPAUVA HMUN" an tih mai, hmân lai a Siakzapauva lo awm tawhna hmun a awm a, chu Siakzapauva Hmun chu khâm chheng chhia leh chhawrdawh takin a hual vel a, kal khân a awm tlem hle a. Siakzapauva pawhin a him tawk hle in a hria a, "Vana arsi tuman an hawl thla thei love..." tiin a ṭawng uang hle a. A inthlah dul deuh nge ni, Sailo lal Lalsavunga chuan Aizawl atangin a rawn hneh ta tho a ni.

Hêng te avang pawh hian Lalruanga Tui thuhruk hi tlawh a manhla hle a ni. He thlalak hi Pu Vanthuampuia Phullen in a hmun a han tlawh ṭuma a lâk a ni.

Thulakna: (1) Phullen Ram @ Harhfim-II (Phullen Dry Village Silver Jubilee Souvenir) a Pu Lalsângzuala ziak. (2). Pu Vanthuampuia titi. > Phullen

ZO Palai

Lalruanga Tui Thuhruk|Laiphir

1 comment

Labels