He thu hi kan ziakin kan chhiar fo tawh awm e. Mahse, rin aiin a sawt mawh pek a, a mak reng khawp mai. Hruaitu nih tling pha tawhte hi chuan tawng hi kan duhtui em em tur ani a, zir tur ani. Puipunna hmuna inkhawm hruaina tawng kam kan hman dik loh tlem thur chhuakin tarlang ila.1. Hla: Kristian Hla buah hian hla thupui a awm vek a, Pathian chawimawina hla vek a ni lo tih hi I hre bel viau ang u (Kristian Hla bu phek VI en la). Hla bu phek hma lamah tarlan a ni e. An ulukzia chu chawimawina thuah pawh Pathian chawimawina leh Lal Isua chawimawina hi a hrana dah thlap ani. Chuvangin, kan fimkhur hle a ngai a, hla thupui lam tel kher lovin hla number leh chang khatna tlar hnih khat tal fiah taka lam rik hi a tha tawk mai thei a ni. Entir nan,
“Tunah Hla no. 1-na Thainghlim Thianghlim, engkim tithei Pathian, tih hla hi kan zaa dingin i lo sa ang u,” ti ila kan tisual lo berin a rinawm a ni. Tun lai hla tharte pawh hi thlitfim a hunt a hle niin a lang. Khawi lam hawi hla nge tih pawh hriat hleih theih loh khawpin an phuah kual vel mai mai tae m ni aw? Thenkhat hla thute phei chuan Trinity leh Kristian Thurin a kalh hial ni tein ka lo hreve thin.
Zai mi thenkhat lahin a thu tum chik chiang lovin thiam em ema sak an tum leh mai thin bawk a, a tha lo khawp mai. Thahnemngaih thuah kan han peng lawk ani e. Chhunzawm leh tai la, hruaitu thenkhat chuan hla sa tura min sawm apiangin eng hla pawh ni se, “Pathian chawimawi nan” an ti zo vek mai a. A hahthlak lam deuh zawng a ni e! ‘Aw Lalpa I malsawmna hlu” tih hla phei hi chu a rim lehzual a. He hla hi Kristian Hla bu no. 553-na ah a awm a, a thupui chu ‘Kum hlui leh kum thar’ lam hawi ani.
Sawi tak zelah chuan “Kan thu rei ta bawk a, dingin hla i lo sa teh ang u” ti tawk kan awm leh thin a. Heng mite hian hawihawm chhuahin tawngkam chuangtlai an hmang thin ani zawk. Mawng kham reh tura inzaitir hi a mawi lo khawp mai a, mawng kham reh hla hi hla thupuiah a awm heklo. "Kan zaa dingin he hla hi i lo sa ang u" ti mai se a tawk a. Mipui lam pawhin remhria an ti ngawt zawk ang le! Chutiang deuh bawk chuan Ban hla hi a hranin a awm lova, "Hla no... kan sa ang a, malsawmnain kan inkhawm kan titawp ang." tih hi a tha tawk em em ani.
2. Thu Puan: Thupuan a nih tak avanga 'rawngbawlna' kan belh kher hi eng nge a chhan ni ang aw? Sermon rawngbawlna, thilpek hlan rawngbawlna, solo rawngbawlna, zaipawl rawngbawlna, adt., kan ti ve chuang si lo va. "Kohhranho hriat tur pawimawhte puang turin kan sawm e" ti ila mawhphurhna neitu chu a lo dingchhuak ve mai dawn ani. Mipuite pawhin tu hnen atang maha ngaithla lovin mahni hnen atang theuhin kan lo ngaithla ang a, a bengvarthlak ngawt ang.
3. Zaipawl/Solo: "Tunah Zaipawl i lo ngaithla ang u," emaw, "an hla inbuatsaih chu hlan turin i lo sawm ang u," ti tawk kan la awm ta fova, a buaithlak khawp mai. Zaipawl (choir group) hi mihring an nih avangin ngaihthlak chi a ni lo va, zai tura koh chi an ni zawk. Hla an sa ang a, keini'n kan lo ngaithla ang. Tin. hla hi kan hlan ngai lova, kan sa thin a ni. Chuvangin, "Tunah hla mawi rem turin... i lo sawm ang u," ti ila an alo ding mai dawn ani. An hla chu an hlan lo ang a, an sa ang. Chutiang deuh bawk chuan Sermon pawh hi kan hlan ngai lova, kan ko va, an lo ding a, Pathian Thu an sawi ta char char mai ani. Thlahlel tak leh duh takin kan lo dawngsawng a, Pathian malsawmna pawh kan dawng nge nge thin a ni.
Thu Belh: Mutthluk hi a hmun pawh a ni lova, a hun bawk hek lo. "A mawi lo" tih bak chu sawi tur a awm lo a ni. Rev. Hrangsailova khan, "Biak Ina ka mutthluk palh hian ka inhaw em em a ni," a ti a, ka la hre reng mai. Maimitchhing chunga thu ngaihthlak pawh hi a mawi lo a ni. Mite nen kan inbiak laiin kan maimitchhing ngai em? Kan Pathian, kan biak dana kan nungchang hi chu mite tan malsawmna ni lovin tlukna a ni zawk. Mizorama ka zin tumin kan laina zinga kohhran upa pakhatin in hrang chang tawh laina zawng zawng pawh ko khawmin chhungkaw maicham a siam a. Uluk takin Pathian Thu ka sawi a ni. Kan zinga zu in mi (kan vei deuhte) hnenah chuan, "Eng nge in an?" tiin thingpui in lai chuan ka han zawt a, an ngawi tlat mai. Pakhat chuan zawi tein, "Tunge chaw ei laia muthlu i hre ngai em? I thusawi lai khan piangthar intiho pawh an muthlu vek a, a ngaihna ka hre lo a ni," tiin min hrilh a ni. Pathian kan biakna tawngkam leh awm dan hian kohhran inpawlhona boruak a siam a ni tih hi kan va hre har tak em!
Ziaktu: Rev. K. Biakliana
New Generation Mission, Mandalay
I Ngaihdan Leh I Comment Hnutchhiah Te Kan Ngai Pawimawh A Ni. EmoticonEmoticon