Nahaia hi Samdala tih loh vekah chuan thatchhe hmingthanga sawi a ni a. Chhura nen hian in khata cheng dun reng an ni a, mahse nupui fanau an lo neih tak hnu khan in khata chen dun reng chu a lo rem ta lo va, tichuan a upa zawk Nahaia chu a in dang ta a ni. Nimahsela, a thatchhiat em avangin in chu a sa tha ve peih lo ni ngei tur a ni. A chungte pawh a awng nasa hle a ni ang. Ruah a lo sur a, a luah hlei thei ta mang lo va, a mangang chu Chhura hnenah bawk a zuang lut leh ta niin a lang. Heta an thu sawi dun dan hi chu chiang taka hriat a awm lo va, mahse kan hriatdan tlangpuiah hi chuan Nahaia hian Chhura hi a va tihder a, in an inthleng ta niin sawi a ni. Nimahsela, hei hi rin mai ngam a ni lo vang, a dan leh a vang dang a awm ngei ngei tur a ni, in erawh chu an inthleng ta ngei chuan rin theih a ni ang chu.
Chutia u zawk manganga lo zuang lut leh ta ngawt mai chu a mualpho zuk nia tiin Chhura hian tlawm a ngai a, a mualpho tir loh an Nahaia sawi ang ang chu, aw a ti ta zel ni tur a ni. Chhura hian lo hnial teh khu sela, an unauva mawi lohna zakhua chu a thleng dawn si a, naute tia ngam taka rawn ti chu anin a lo hliahkhuh a, tlawm a lo ngaih loh chuan a dik tawk bawk lo a ni. Ani Chhura chuan chu mi in han siam that mai chu a rilru takin huphurh si hek lo, chuvangin a u mualpho tam lohna apiang chu a remti ta a, in chu an inthleng ni ngeiin a lang zawk a ni, ani Nahaia kha amah leh amah inhliahkhuh a tul ta tlat mai bawk a, a inhliahkhuh nan a nau kha a hmang ta mai a ni, chutilochuan a zia-awm ta si hek lo. Tichuan, mite hnena a sawi dan chuan, Chhura kha a tihder ngei a, a in a thleng sak ta nia a sawi a ngai ta a ni. Chutilochuan, a insawi mawi thei si lo va, a ngaihna a awm ta lo a ni ber mai. Nau te ni na na chuan engtin min tih hlei ang, a ti ringawt mai a nih loh nakah.
Hetia in pui leh in pui meuh a chhia leh a tha si, han inthleng leh rih ta hi unau kar thu a ni ang tih chu a rinawm ta em em a ni. An mizia te kan han chhut hian a rinawm ta deuh deuh va.
Chutiang zelin a changin lo te an inthleng a, bahra te an lai dun a, sial te an intawmin an thawk dun a ni. A thawk nasa zawk leh a chak zawk chu Chhura hi a ni fo va, Nahaia hi chu a zelthel zawk a ni fo a ni. Tin, mi hnena a sawi dan chuan Chhura hi a tihder a, a bum ni fovin a sawi a, chu chu insawi mawi nan a hmang mai a ni.
Chhura hian hrelo pawh a ni lo, mahse a u thiltih hi chu a tuar zovin a pawmzam lui ve hram hram a ni.
Tunah chuan Chhura leh Nahaia chu unau anni ngei tih chu rinhlelh rual niin a lang ta lo, amaherawhchu, a u chawimawi a tum hram hramna leh a u a hliahkhuh hram hramna hi Chhura hian kum khuain tun thlengin a hming chhiat phah a, at a hlawh phah ta a ih hi. Nahaia a u tana a tuarna leh a tlawmngaihna a u hlikhuh a tumna leh a u laka a dawhtheihzia hi a fakawmin a zir tlak a, hei hian a tihmingthang zual bawk ani.
I Ngaihdan Leh I Comment Hnutchhiah Te Kan Ngai Pawimawh A Ni. EmoticonEmoticon