Lianchhiari hi Chuauhang mi a ni a, lal an ni nghe nghe a. Tin, Chawngfianga hi Hnamte mi a ni a, hnamchawm a ni a, an khua chu Dungtlang a ni a. Lianchhiari hian Chawngfianga hi a ngaizawng em em mai a, Chawngfianga erawh chuan lal nula a nih avangin a ngaizawng ve ngam mang lo va. Lianchhiari hi a hmel a tha em em mai a, hmeltha mah se la nula chu miin an rim ngam mang lo va, an ngaizawng ve ngam hlawm si lo va.
Lianchhiari pa lo vah lamah chuan Bung lian tak mai tawi deuh mai hi a awm a,
"He mi thlak ngam hi chu awm se Lianchhiari ka neihtir mai tur"
a ti a. Lianchhiari chuan a pa hnenah chuan
"A thlak ngam tur chu zawng la, ka lawm dawn nia"
a ti a. An khuaa tlangvalho hnenah chuan Lianchhiari chuan
"Ka pain kan lova bung thlak ngam tur a rawn zawn chuan tuma'n kan ngam lo vang, Chawngfianga chauhvin a ngam ang lo ti zel ang che u"
a ti a. Chutichuan tuma'n ka thlak ngam ang ti lova Chawngfianga chauhvin a thlak ngam ang an tih theuh tak avangin Lianchhiari chuan Chawngfianga chu a lawm ta a, a pa ho chuan an feh ta a.
Chawngfianga chuan thing chu a lo thiam kher mai a, bung zar chu a han rawt thla ta a. Vazai lengthla ang mai hian an tla thla zung zung mai a, Lianchhiari pa chu a lungawi em em mai a,
"Mi hetiang reng reng ka hre ngai lo ve, in tih tihin han inti rawh u"
a ti a, a hawsan ta a.
Chawngfianga chuan bung chu a thlak zo ta thuai a, a thlak zawh chuan a chhuk dawn ta a. Chawngfianga chhukthlakna tur dal tak chuan Lianchhiari chu a lo awm a,
"Kha, kiang rawh ka lo tum thla dawn e"
a han tih pawhin a awm lui tlat a. A tawpah chuan a kut leh ke a kham ta a, a sir deuhah chuan a han tum thla ta a, a kawr hma lam chuan a zap fuh a, Lianchhiari chu a tlu ta mai a. Chawngfianga chuan
"A khaih, ka tihpalh miau, a na ta lawm ni?"
tiin a han kai tho leh ta mai a. Nakinah chuan an chawfak zo an haw dawn chuan Lianchhiari chuan a pum a tina der a, Chawngfianga puak chu a ngen ta a, a han paw ta a, hmathlak a ngen leh a, a han hmathlak a Lianchhiari chuan
"Hmathlak fual deuhvin"
a la ti ta zel a. Nimahsela lal nula a nih avangin a la ngai ngam ta lo va, in chu a pawthleng ta a.
Tin, nakin deuhvah chuan Lianchhiari pa chu a sekhuang ta a. An thingfar zan chuan nula leh tlangvalhovin chawng an chen a, zu te an in a, nuam an ti em em mai a. Chu mi zan chuan Lianchhiari leh Chawngfianga pawh chu an lo inngai ta a. Sum hmun chhak lama kel khumah an lo mu dun a, a nu thing va la tur chuan a va phawk ta a. Lianchhiari mal var chu kel note emaw a ti a, "Kel, kel, kel" a ti a, a han chhir a, mahse, Lianchhiari te an ni tih a hriat veleh
"E, nangni in ni maw"
a ti a, a luhsan leh ta mai a.
Chutia an inngaih chu a puang ta si a, miten an hre ta hlawm si a, an se chhun turte pawh chu an thulh ta hial ani. Anmi kohte pawh an haw leh ta vek mai a. Chu mi tuma Lianchhiari hrilhhai chuan hla a phuah a
"Kan va tih luattuk a,
Lengin ka zir sual e,
Ka pa van hnuai thang tur,
A than ni bang kir e,"
a ti a, hei hi a pa hming tichhe deuhva a inngiah avanga a phuah a ni a.
Chu mi hnu nakin deuhah chuan inneih an tam ta a. Chawngfianga thlahtu Thura hi an palaitir a, Lianchhiari pate chuan Chawngfianga hi an duh em avangin manah chuan hreipui pawh sialah kan pawm zel ang, an ti a. Nimahsela, an palai chuan a itsik vangin sawi pelhsawlhna riak a zawng a, an duh leh an sawi ang chu a letlingin thu a va sawi thin a. Chu chhapah
"Zawhte lian min pe tawh se, an ti"
te a va ti a. Amah chuan inti fel fahranin
"Chawngfing, kan unauvin, Lianchhiari pa te hian sum an pawmham deuh a nih hi, i la thih phah ang tih pawh ka hlauhpui hle mai che a"
a ti vel a. Lianchhiari pa lah chuan
"Eng a ti ngai nge ni le, hetia hreipui te pawh siala pawn zel a, a palai sual em ni ta ang?"
a ti rilru a,
"A mah Chawngfianga chu lo kal teh se, kan lo inbia ang e"
tiin an palai chu a chah ta a. An palai thura chuan Chawngfianga hnenah chuan,
"Kha maw, ka hlauh ang ngeiin thah an tum ta che a nih chu, Chhingzawl khuaah tlan rang mai rawh"
a ti a, tichuan Chawngfianga chu a tlantir ta daih mai a. Lianchhiarin Chawngfianga chu Chhingzawl khuaah a tlan a ni tih a hriat chuan pawi ati em em mai a, Chawngfianga te in ruakah chuan a va kal a, an inthawina arhmul banga an tar thin chu chhuatah a lo tla a, a phuah taa,
"Hmawng ang i pem hnu khan,
I run ram ang ka fan,
Senhri pualhmul ang thlau,
Lum lang an runah e,"
a ti a, chhuatah chuan a han mu tap tap a. an khaw chhak tlang Chhingzawl lan theihnaah chuan a kal a, a zuk thlir a zuk thlir thin a. Chhingzawl kawtlaia an inkawihnawh lai te chu a zuk hmu thei a,
"Isi, Chawngdangan a len leh ta"
te a lo ti thin a. Chawngfianga dartawnsuk tle zawk zawk te chu a zuk hmu thin a, a lung hi a leng thei em em mai a, hlate hi a phuah a
"Tlangah zuk thlir ila,
A lang lo zawl khawpui,
Chawngdanga hliahtu kha
Kiang teh aw thirngrihnim,"
a ti a. Chutia a han zai chuan Hriangzau thing kung sang pui pui te hi a kur dulh dulh thin a, tichuan Chawngfianga khawlai leng chu a zuk hmu chiang thei thina, hla dang a phuah leh a,
"Tlangah zuk thlir ila
Thle nghiala tuala tual a len,
Keimi cho rual awm lo,
Len thiama mi za hril,"
a ti a. Ani Chawngfianga pawh chu a lung a leng thei em em mai bawk a, Lianchhiari a nei thei lo chu pawi a ti a, hlain a phuah a,
"A palai maw let ang an sual e,
Lungruni buan ang kan pawm lo ve,"
a ti a. Chu chu a Palai Thura khan a lo hriatin thiam inchan tir nan hla bawkin a phuah ve a,
"A Palai maw let ang kan sual lo ve
I neih sum--sialin a zo lo ve,"
a lo ti ve leh bawk a.
Tin, a nakin hnuah chuan Hauhnar mi pakhat Tulera chuan Lianchhiari chu neih a duh ta a. Nimahsela Lianchhiari chuan
"Chawngfianga ka sawi haw tur chu ka nei duh lo ve"
a ti a. Lianchhiari chu a hmeltha si a, tulera chuan
"Ka haw lo vang e"
a ti a, an innei ta a.
Nikhua a lo rei ta a, Lianchhiari chuan fate pawh a lo nei tawh a, tin, Chawngfianga pawhin nupui te a lo nei tawh bawk a, fate pawh a nei ve tawh a. Nimahsela an inngaih leh an lunglen chu a reh reng reng lo ve ve a.
Vawi khat chu Lianchhiari te khuaah chuan Chawngfianga fate chu purphurin an han kal a, an pur chawkna tur chu hrei pui a ni a. Lianchhiari chuan Chawngfianga fate an ni tih a lo hria a,
"In hreipui chu keimahni'n kan lo lei ang e"
a ti a, an in ah a thlentir nghal a. Ama fapa Vanpuia leh Chawngfianga fapa chu a inbuantir a, Vanpuia ke te chu a lo phet a,
"Pakchheih-khah, keimah Chawngdanga fapa ti ta che"
a ti a, Chawngfianga fapa chu a chaktir zawk a, ama fapa chu a keuhtir zawk a, ama fa ai mah chuan a lo duhsak zawk a. Tin, zingah chuan an buh phurh tur chu a tehsak a, an hreipui pawh chu a teh tel leh a, an hriat lohvin a phurh hawntir leh a.
A nakinah chuan aman Chawngfianga chu bellam zuarin Lianchhiari te khuaah chuan a han zin ve leh a. Chutih lai chuan Lianchhiari te chu an Chawn lai a lo ni a. Lianchhairi te kawmthlang chu kawng a ni a, chuta Chawngfianga kal lai chu Lianchhiari pasal chuan a zuk hmu a,
"A tu chu ni hlau hlau maw"
a zuk ti a, Lianchhiari chuan a zuk en a
"Kiemah Chawngdanga ti ta che"
a zuk ti a. Lianchhiari chu pawnah a va chhuak a,
"Engnge i lo tih dawn le?"
a ti a, ani chuan
"Kan tam em a, bellam te ka rawn zuar ani,"
a ti a, tichuan zu in tur chuan a kai lut ve ta a.
Zu chu an inho ta a, khuate chu a lo tlai lam ta a, mite chu an tin zo ta a. Tu dang mah ngaihsak ta lo chuan an pahnih chauh chuan zu chu khawnthiang chuan an khawn ta a. Chawngfianga lahin thlen in lam pawh zawng bik tawh hek suh. an pahnih chauh chuan an awm dun ta a. zu te chu an inpen per sek sek thin a, Lianchhiari pasal Tulera kha a en reng a, a hmu ning chu pawnpuiah a han inzial rawk a, pawnpui chu a han keu dek dek a. A han en a, anni lah chuan an pawisa si lo va,
"Chawngfiang, hman lai in nulat tlangval lai hian ka chhung-nu ne in inhmel duh deuh awm maw?"
a han ti a. Chawngfianga chuan,
"Hnai lo ve a, anni lal an ni a, kei mi chhia ka ni a, an khuaah erawh chuan ka awm ve ani"
a ti a. Lianchhiari chuan,
"E! Chawngdang, i hlau elo? Chhuah lam leh tlaklama ui thi hnuha ka hnuh hun hun hnu a nih hi ti ta che"
a lo ti a. Tichuan, an tlaivar dun ta a. Chawngfianga kha leh-lan tuma kal a ni a, mahse chutia an awm tak avang chuan hla a phuah a,
"Nilen ka tum lo ve,
Tlaivar ka tum lo va,
Thadang anka ka bia,
Nilen ka tum leh a,
Tlaivar ka tum leh a,"
a ti a.
A tukah pawh chuan Lianchhiari chuan a chelh leh ta a, ni lengin zu an in leh a, Tulera chuan Chawngfianga hnenah chuan
"Thiana, a ngaih chu min ngaih sak em tawh suh ang che aw"
a lo ti thin a.
Tin, Lianchhiari pasal thih hnu tawhin an sepuia a bo va, an zawng an zawng a, an hmu zo ta lo va. Lianchhiari chuan
"A va pawi em ve aw"
a ti vawng vawng a, a fapa Vanpuia chuan
"Ka nu, a pawi lo ve chu aia pawi zawk chu i nulat laia Chawngfianga i lo ngai hi a nih hi"
a han ti a. Ani Lianchhiari chuan,
"E e e, chutiang tea i han tih vei chu le, nangmah mah hi Chawngdanga nena kan fa ni la tih nak alaiin"
a tihsan mai e an tih chu.
A tawp ta!
I Ngaihdan Leh I Comment Hnutchhiah Te Kan Ngai Pawimawh A Ni. EmoticonEmoticon