Hmanlai hian vawi khat chu Satel hi thingtlang khaw pakhatah chi lei turin a kal a. A haw lamah chuan Zawng rual hian thing kungah a rah an lo ei sup sup hi a hmu a. Satel chuan a rah thenkhatte chu rawn thlak ve turin a ngen a, Zawng chuan an rawn vawm thlaksak a. A ei zawh chuan a dang rawn vawm thla leh turin a ngen leh a; mahse, Zawng chuan an lo hnial a.
“I duh leh nangmah rawn lawn la, lo ve mai rawh,”
an ti a. Satel chuan,
“Thingah ka lawn ve thei lo,”
a ti a.
Zawng-te chuan,
“I duh phawwt chuan kan zawn chho mai ang che,”
an ti a. Satel chuan a remti a, an zawn chho ta a, Thingkakah an zep a, thei rah chu duh tawka an ei hnu chuan Zawng ho chu an kalbo ta vek mai a. Satel chu leiah dah thla leh lovin an kalsa ta daih mai a, a chi phurh pawh chu an laksak bawk a. Satel chu a mangang ta hle mai a, a zuang thla ngam silo va, lungchhe takin a tap a tap ta mai a. A mittui a tlak nasat em avangin a awmna thing bulah chuan lui-te ang maiin a mittui chu a luang ta a.
Chutihlai chuan Sakhi alo kal a, tui chu a han in a.
"He luite tui chu a va han tui tehlul em!"
a ti a.
Thingkaka Satel awm chuan,
"Hei hi luite tui a ni awzawng lo ve, Ka mittui a nih hi,"
a lo ti thuai a. Sakhi hnen ah chuan a tahna chhante chu a hrilh vek a. Sakhi chuan a khawngaih hle mai a.
"Ka hnungzangah hian rawn zuang thla ta che"
a ti a.
Satel chuan,
"I hnungzang kha zung li bawk leka zau a ni si a, ka zuang thla ngam lo ve,"
a ti a. Chutih lai chuan Zukchal a lo kal a, tui chu a han in ve a, tui a tihzia chu hahipin a sawi a sawi ta mai a. Satel chuan,
"Lui tui a nih loh kha, ka mittui a nih kha,"
a lo ti leh a, a tah chhante chu Sazuk hnenah chuan a lo hrilh leh a, Sazuk chuan a hnungzanga zuang thla turin a hrilh a. Satel chuan,
"I hnungzang kha kutphah pahnih bawk leka zau a ni si a, ka zuangthla ngam lo ve,"
a ti leh a. Chumi hnu lawkah chuan Sai a lo kal a. Tui chu a in ve a, tui a ti hle mai a, Satel chuan,
"Lui tui a nih loh kha, ka mittui a nih kha,"
a lo ti leh thuai a, a tahna chhante chu Sai hnenah chuan a lo hrilh leh vek a. Thil awmzia Saiin a han hriat chuan Satel chu a khawngaih ta hle mai a.
"Ka hnungzang hi thlangra ang mai a hlai a ni a, ka chhungah chiah hian rawn zuang thla la, a him thlak ber ang,"
a ti a. Satel chu a zuangthla ta a, a saisir zawngin Sai hnungzang ruhah tak chuan a deng ta zawt mai a. Sai hnungzang ruh chu a tliak a, a thi ta a.
Satel chuan Sai sa chu a theih ang tawka tam a ei a, Zawng chenna khaw bulah chuan daileng turin a kal ta a, a va e ta teuh mai a. Nakin lawkah chuan Zawngho chu feh turin an lo chhuak a, Satel ek chu sa emaw tiin an ei zo ta a, Satel chuan,
"Nachin lawk kha chuan thing kakah min hnutchhiah a, tunah chuan ka ek in ei ta a nih kha,"
a ti a. An ek zawh hnu chuan bawm chhung ah an biru vek a, Satel chu a lo chhuak a, Zawngho chu a zawng ta a. Bawm chhunga an biru chu a hmu a, bawmah chuan a childhnan sauh sauh a, khamah a nam lum ta a. An zinga raipuar pakhat tih loh a dang zawng chu an thi fai vek a, raipuar awm chhun erawh chuan khama hruizam a man fuh hlauh mai a, a uai chho a, damin a chhuak ta a. Chu chuan no tam tak a nei a, Zawng zawng zawng hi a thlahte an ni, an tia lawm.
A tawp ta!
I Ngaihdan Leh I Comment Hnutchhiah Te Kan Ngai Pawimawh A Ni. EmoticonEmoticon