“Lalpa chu ka nghak fan fan a; …boralna khuarkhurum ata, chirhdup ban tak ata chu mi khai chhuak ta bawk a; …lungpui chungah a nghat a, ka ke pente chu a ti nghet a. Hla thar ka kaah a dah ta bawk a…Inthawina leh thilhlan chungah hian lawmna reng I nei lo va; …nang chu mi tanpuitu leh mi chhanhimtu I ni a; Aw ka Pathian, rei rial lul suh ang che” [Sam 40]Ka Professor pakhat hian Israelten thlalera puan In an kaih thin thu a sermon-ah a sawi a. Puan Inah hian a puan te, a kaihna hmun te, mistiri hna thawktu te, a kaihna hrui te leh a kaihmarna ngarte a awm a; chungte chu an pawimawh em em vek a, tel vena an nei vek. Mahse, mahni nihna emaw tel vena lai tak hre lo a awm theih a, kei erawh chu a kaihmarna hrui an khen behna ngar ka ni a ti a. Lei lamah khen luh a ni a, mi hriat tham loh a ni a, a hmuh theih mai loh bawk. Mahse a ban pui ber Puan In innghahna a ni tiin a sawi. Leia khen luh, tuma hriat loh mah ni se, Pathianin a hunna a ni tih a hre tlat a, a hlim em em tho a, a tih turah chuan a tha ber zelin a thawk mai a ni; Lalpan a tana plan a siamsak chu chhel takin a nghak a, a thawk a, tihpuitlin a tum a ni. Heti ang hi Lal Davida pawh hian Sam 40 ah hian a lo sawi a, a pawimawh ang aiin kan mausam thin a, ngun takin zir chian a tul a; he mi hmang hian Lalpa aw thar hriat kan tum dawn nia.
Davida’n Pathian chu chhel takin a nghak a. Pathianin khuarkhurum a ta a la chhuak a, lungpui chungah a din nghehtir a; hla thar a pe. Pathian rin a pawimawhzia a sawi a, amah ringtu apiang mal a sawm thu a tilang. Pathian ngei ngei pawh hi thilmak tithin Pathian niin a sawi leh a, mi tin tan plan fel tak a neih thu a sawi chhun zawm zel. Inthawina leh thil hlan hian Pathian a tilawm lo a, Pathian erawh chuan a fate chu thu ngaithla a, zawmtu lo ni se a duh tih a sawi lang leh a. Amah rin thiam nan tanhmun a tih phet chang a awm niin a lang awm e. Chu Pathian chu Davida hian a hre hneh hle mai a, “Lalpa’n a pui” a tih tawp mai a bakah, “Ngil a nei” a ti bawk a ni.
Pathian chu hma lam hun atana plan siamsaktu a ni a, a plan siamte chu mal a sawm a. A lo hlawhtlin theihna atan thilmak a ti thin. Ringtute nunah Lalpa chu tichhetu ni loin, puitu a ni. Ngenna te, dilna te leh a plan chu a lo hlawhtlin hmain chhel taka nghaktu nih a pawimawh hle. Chungte chu ngaihven a, taima taka Pathian hnathawh thlir a tul. Pathian aw chu hriaa ngaithlaa zawmtu ni turin mihring hi a pawimawh a, a inbuatsaih tur a ni. Chu chhelnaah chuan Pathian a che a, khuarkhurum leh chirhdup diaka mi pawh lungpuiah Pathianin a hlang chho a. Hla thar a pe.
Mi tinin Pathian kohna kan nei theuh. Hre loin mahni duhna lamah kan tam thin. Pathian plan chu a kal pangngaiin a kal reng. Tawngtaina leh chu plan chu a in-unau-hmel-haih tlat. Heti anga nun buai ru, tifuh thei lo hi an tam em em. Dil si a peka awm lo te, kik si a inhawng si lo te, zawng si a hmu ting si lote an ni mai. Pathian leh mihring a inbuan a ni ber e! Jakoban Pathian a buan a, a khel ruh hmehpelh a nih hnuah ‘Israela’ tih hming thar a lo nei ta a. Engti zawng emaw tala Pathianin a khawih loha harh chhuak thei lo nih a awl. Hnuai lam atanga duh tawk tawka Pathian chu lo buan buai hi a awm a ni. Mahse a plan chu a plan a ni a, a tih tum chu tuma dal rual a ni lo. Chu zawk chu leh hriat hloh a, lo nghah thiam hi a hlu a ni. Pathian plan kan hriat theih loh reng chuan, kan hriata chhel taka kan nghah a duh si a, Jakoba ang deuha min tihchhiat zet hnuah hming thar (aw thar) kan nei ve lek chauh ang tih a hlauhawm. Heti ang deuha a tih tul chang a awm thin reng dawn a lo ni. Tunah hian eng harsatna nge I lo neih ve? Lalpa khi puitu a ni a, a pui thin. I tana tha ber tur Pathianin plan a siamsak che a ni tih ringhlel suh la, a aw hriat tumin chhel tak leh thuawihnain amah chu nghak ang che. Lungpui chungah a chawlhtir ang che a, aw thar a pe ang che a, a thuam ang che.
Mi ngaiha lian lo, hriat tham loh, Van lam tan erawh chuan hlu tak a awm a. Heti ang dinhmunah hian Lalpan a hung che a ni thei. Davida’n chu chu a lo hre chiang hle mai a, Pathian chu puitu, ngil nei, chhel taka nghaktute hnena an tawngtaina malsawmsaktu, plan a siam thu chu hriain, thu awiha amah chu nghaktu nihte leh chu chu malsawmna aw thar a ni a lo ti a. A pawimawh hle mai. Kan dil a, min pe lo. Kan kik a, min hawn lo. Kan zawnga kan hmu lo hi a chhan ber awma lang thei chu ‘Pathian chhel taka nghah’ kan taima lo; tisa takin Pathian planah khian kan lo inrawlh ve zut zut zel a ni e. Pathian chetna daltu ber chu Pathianin hma pawh a lakh ma hauh a, kan lo ti teuh zel hi a ni. A plan buatsaihah innghat la, ring la, chhel taka nghakin thu chu zawm la ngaithla fo ang che.
Amen!
Ziaktu: Rev. Lalpekmawia
I Ngaihdan Leh I Comment Hnutchhiah Te Kan Ngai Pawimawh A Ni. EmoticonEmoticon