Hmanlai hian ni khat chu unau hmeichhe pahnih hian lo-ah fanghma to an zawng a, a naupang zawk chuan a chhar thuai a; a u zawk erawh chuan chhar tur a hm ve thei hauh lo mai a. A u chuan a nau hnenah chuan a fanghma chu phel ve turin a dil a dil mai a; nimahsela, a nau chuan nu leh pate nena ei ho atan hawn a duh avangin a pe phal ta lova. Chutia a pek phal tak tlat loh avang chuan a u chu a thin a rim ta a; a bula sawntlung chu amah rawn zial pil daih turin heti hian a lo ta a-
"Sawntlung aw mi zial, mi zial,tiin.
Ka nauvin fanghma min phel phal lo ve,
Sawntlung aw mi zial, mi zial"
Tichuan le, sawntlung chuan a u chu a zial tan ta a; zawi zawiin a pil ta riai riai mai a, a tawpah chuan a chhip chauh hmuh theihin a pil ta a.
A nau zawkin thlam a thlen hnu rei lo te-ah chuan a nu leh pate pawh chu an lo thleng ve a. "Khawiah nge i u a awm?" tiin an zawt a, ani chuan, "Fanghma min dil a, ka pe phal lova, sawntlung a in zialtir ta a ni," tiin dik takin a chhang a. A nu leh paten chu chu an han hriat chuan an mangang ta em em mai a. An fanu chu a rang thei ang bera a u ko kir leh turin an tir ta nghal a. Tichuan, a va kal a, heti hian a ko ta a -
"Ka u, ka u lo kir rawh,tiin.
Ka nuin thi a lei ang che;
Ka pain dar a lei ang che,
Ka u, ka u, lo kir rawh,"
Tichuan, a u chu a lo chhuak tan ta a. A taksa chu a rawn lang sang tial tial a, a khup chin hnuai lam chauh a la chhuak kim lova. Chutih laitak chuan ral an lo kal ta thut mai a. Hlauhlawp leh hmanhmawh takin a u chu a phih ta vak mai a. A khup a chin hnuai lam chu a bung a, leiah chuan a tang ta a, chu chu pa-ah a lo to ta a ni.
Thulakna: Mizo Thawnthu (Darchhawna)
I Ngaihdan Leh I Comment Hnutchhiah Te Kan Ngai Pawimawh A Ni. EmoticonEmoticon